ما الفرق بين الزوجة المصرية والزوجة الأجنبية؟

ملحوظة: التدوينة بالعامية المصرية

بما أن موضوع المقارنة بين الزوجة المصرية والزوجة الأجنبية اتفتح يبقى خلينا نتكلم فيه بشكل أعمق شوية وبدون تحيز لطرف عن الآخر.

أولاً تعميم إن الزوجة المصرية أسوأ زوجة، والزوجة الأجنبية أفضل أو السورية، ده تعميم ليس صحيحاً إطلاقاً، ومحتاج شيء من التفصيل:

الزوجة الأجنبية:

مش أي زوجة أجنبية أصلاً تنفع مع الزوج المصري، يعني ماجيش أقول أنا هتجوز أجنبية، وبكده هكون ظبطت نفسي... لا يا سيدي بص، والكلام على المعظم وليس التعميم، ولكل قاعدة شواذ ده مش قرآن.

أنت كمصري ما ينفعش معاك الزوجة الأميركية والكندية والألمانية وأي دول أوروبية ممكن نستثنى كوسوفو إلى حد ما لأن بناتهم أغلبهم بيقدسوا البيت والزوج والأسرة وطبعاً الأوروبيات من أصول عربية خصوصاً الشوام والفلسطينيين.

لو تزوجت أجنبية هتكون مبسوط في الأول بالشكل والجمال، لكن مش هتقدر تستحمل اختلاف الطباع والعادات والثقافة وبرودهم في التعامل طبعاً (باردين جداً هينقطوك).
وأكتر حاجة بقى إنها هتعاملك زيك زيها بالظبط في البيت وفي كل حاجة، مفيش حاجة اسمها انت الراجل وهي الست، لا يا حبيبي انسى وده انت مش هتتقبله، وبعد شوية مع الصدامات دي وهتكون اعتدت الجمال هتكره نفسك وهتطلقها، ومصيبة لو معاك منها ولاد دي قصة تانية!
- أفضل زوجة مناسبة إلى حد كبير كأجنبية هم بنات الاتحاد السوفييتي روسيا وما حواليها من الشيشان والقوقاز وأوزباكستان وأوكرانيا بيقدروا الزوج ومناسبين لطباعنا وتقاليدنا إلى حد كبير كمصريين.

الزوجة العربية:

أفضل زوجة عربية للزوج المصري بالطبع الشوام، لكن التعميم المطلق ليس صحيحاً، يعني لو قلنا سوريا مش كل السوريات هيبقوا أفضل زوجة فيه بعض المناطق في سوريا (ومش لازم أذكرها) بيكون أسلوبهم إلى حد كبير عنيف وجاف مش هتقدر تستحمله يا عم الرومانسي.

الزوجة المغربية والتونسية الملتزمات منهم زوجة مثالية.

بعد الكلام اللي فات ده بقى تعالى نقارن بين الزوجة الأجنبية والعربية (اللي قلنا عليهم فوق ينفعوك) والمصرية لو قدامك التلاتة وعايز تختار تعالى أقول لك المميزات والعيوب اللي ممكن تلاقيها، وزي ما قلت دي صفات الأغلبية في كل منهم يعني فيه ناس ما ينطبقش عليهم كلامي:

قبل الزواج:

١- الزوجة الأجنبية:

- مفيش أي عوائق مادية ممكن تقف قدامك إطلاقاً من حيث المهر والشبكة والتجهيزات اللي تقدر عليه وده هديتك ليها، وشقتك اللي هتعيش انت وهي فيها وطبعاً مفيش أبوها هيعاملك بقلة ذوق ولا أمها هتطلع بظابيظك!!

ولا هي هطلع روحك في اختيار لون غرفة النوم ولا تخليكي تشتري نص معارض الموبيليا والمفروشات اللي في مصر!

لكن لو عملت معاها موقف أو اتنين معجبهاش أو قليت معاها ممكن ما تعرفكش في لحظة ومش هتعرف تراضيها ولو عرفت لو اتكرر حاجة تاني انسى يا معلم.

٢- الزوجة العربية:

- الشوام بيطلبوا في الأغلب مهر كبير جداً وشبكة لكن انت اللي بتجهز شقتك وبيتك على قدر مقدرتك وحماتك بتكون سكرة ولذيذة والبنت ملهاش طلبات كتير في الشقة.

٣- الزوجة المصرية:

المهر والشبكة والتجهيزات والعفش غالي جداً، لكن الأهل همّا اللي بيتحكموا في موضوع المهر والشبكة ده، وبيطلعوا عين الزوج؛ لأنها لازم تجيب شبكة أكتر من بنت خالتها، ومهرها أكتر من بنت عمها، لكن فيه بنات مصريات كتير ذوات دين وخلق ما يفرقش معاهم المهر والشبكة، وعايزين يكون ليهم زوج مؤدب متدين أهم لكن تحكمات الأهل تغلب على الموضوع، فبلاش نظلم البنت نفسها بسبب الموضوع ده.

والبنت المصرية تعرف تراضيها بسهولة وتضحك عليها بكلمتين مهما طيّنت الدنيا غير الأجنبية...
موضوع جمال الشكل في التلاتة هو موضوع نسبي وبيختلف من شخص لآخر وعيب بصراحة نتكلم فيه.

بعد الزواج:

١- الزوجة الأجنبية:

المميزات:

- بتنام بدري وتصحى بدري وتهتم بانتظام بترتيب ونظافة البيت بدون ما تطلب شغالة تساعدها.
- ما بتضيعش وقتها إطلاقاً على الفيسبوك ولا الإنترنت ووقتها دايماً محسوب ومنظم وبتحاول تستغله في حاجات مفيدة وتطور من نفسها.
- الأكل بمواعيد وغالباً صحي.
- بتهتم بجسمها وشكلها والرياضة يومياً، وتهتم جداً إن جسمها ما يزيدش بعد الزواج والإنجاب، اوزنها قبل الجواز وبعد الطفل التالت هتلاقيها زايدة ٣ جرام أيوة ٣ جرام مش كيلوجرام.
- قنوعة ومالهاش في هوس الشوبينج على الفاضي والمليان.
- لا يمكن حد يعرف تفاصيل حياتكم أبداً ولا أي حاجة حصلت بينكم.

العيوب:

- اختلاف الثقافة والعادات والتقاليد في بداية الزواج بيعمل تصادم حضاري عنيف جداً ممكن يؤدي للطلاق لو ما اتعاملتش مع الموضوع ده بحكمة كبيرة.
- غالباً مش هتكون اجتماعية بالقدر اللي انت بتحلم بيه حتى مع أقاربك وطبعاً مش هتسد في العزومات.
- مش هتعرف تعمل لك الأكل اللي يمخمخك فهتحتاج مساعدة خارجية من والدتك دايماً الأكل كله سوتيه!

- مش هتمخخ والدتك في تعاملها معاها ولا علاقتها وبالتحديد في سلامها عليها (مش هتبوسها ١٣ بوسة!) فوالدتك هطلعوا عليك.
- اختلاف اللغة ممكن يكون عائق في توصيل بعض الأحاسيس والمشاعر في مكانها الطبيعي.
- مش هتلاقي التعامل بالعاطفة زينا في كل المواقف في بعض المواقف هتلاقيها جامدة وعنيفة.
- لما هتتخانق معاها هتكون عنيفة جداً معاك لكن صوتها مش هيعلى أبداً.
- بعض الأوقات هتحس إنها ند ليك وده بيكون تأثر نشأتها وثقافتها.
- بتضطر تتنازل عن حاجات من عاداتك وتقاليدك علشان تمشي الدنيا.
- مفيش حد تعرف تتكلم معاه لو غلطت (مالهاش كبير يعني) لازم تحل أمورك معاها هي مهما كانت هي إيه.

٢- الزوجة العربية:

المميزات:

- البيت دايماً نضيف وجميل وبسيط.
- الأكل طبعاً رائع وفظيع وطريقة تقديمه روعة وهتشرفك في العزومات.
- صوتها واطي وبتحترم الزوج جداً.
- بتهتم بشكلها ونفسها لزوجها.
- علاقتها بأهلك هتكون كويسة وأهلك هيحبوها وهتظبط والدتك.
- الاختلاف الثقافي أقل بكتير من الأجنبية.
- لما هتتخانقوا مش هتعلي صوتها ومش هتكون عنيفة.
العيوب:
- بعض اختلافات العادات والتقاليد هتكون عائق في البداية.
- غيورين جداً.
- دمهم مش خفيف.
- مدمنين إنترنت ومواقع تواصل اجتماعي.
- موضوع زيادة وزنهم بعد الجواز بتختلف على حسب من أي بلد ومش بنفس نسبة المصريات ولا عدد الكيلوجرامات.

٣- الزوجة المصرية:

المميزات:
- مفيش أي اختلاف ثقافي أو عادات، بنت بلدك بقى.
- هتستحمل عاداتك وتقاليدك اللي غيرها مش هيتحملها.
- الملتزمات منهم وولاد الأصول هيريحوك وكتير منهم لو بيراعوا ربنا هيرضوك جداً.
- اللي اتعلمت الطبيخ منهم قبل الجواز هتظبطك وطبعاً مش هتتوصى في العزومات.
- مش هتلومك لو ما ساعدتهاش في أي حاجة في البيت عكس الأجنبية لازم هيكون ليك دور وهتساعد غصب عنك.
- ليها أب أو أخ ترجع له لو غلطت ويراجعها.

العيوب:

- بتسهر للفجر وتنام للعصر.
- بتتخن من ٣٠ إلى ٤٠ كيلو بعد الجواز والحمل.
- بتقعد على الفيسبوك والواتساب ٧٠٪ من وقت صحيانها والباقي بتتكلم فيه في التليفون.
- لو اتخانقت معاها نص سكان مصر هيسمعوا وصحباتها في جروبات الفيسبوك والواتساب هيعرفوا التفاصيل كلها اللي حصلت غير الصبح لما مامتها تصحى.
- لازم تجيب لها حد يساعدها في تنضيف البيت أو تستحمل بقى الكركبة.
- الرياضة الوحيدة اللي بتعملها هي الكلام والكتابة على الواتساب.
- الأغلبية العظمى زنانة ونكدية (إلا من رحم ربي).
- أمها بتكون عندها تفاصيلك وتفاصيل البيت وكأنها حاطة كاميرات مراقبة وربنا.

بعد الإنجاب:

١- الزوجة الأجنبية:

المميزات:

- هتلاقي زي ما كانت وانت خاطبها.
- بتتفنن في اهتمامها وتنمية قدرات أولادها واهتمامها الذهني والنفسي بيهم.
- منظمة جداً في تربية أولادها والولاد هيطلعوا منظمين ومرتبين جداً وحياتهم ماشية بنظام.
- ولادك أكلهم صحي وحياتهم صحية والرياضة جزء من حياتهم هيطلعوا متعودين على كده.
- غالباً بتقوم هي بدور المدرس الخصوصي.
- مفيش كارتون إلا في وقت محدد أسبوعياً وباقي الألعاب معظمها لتنمية الذكاء.

العيوب:

- بتتعامل مع أطفالها بطريقة غريبة في بعض المواقف اللي ممكن انت ترتكب جناية فيها، يعني ممكن ابنك يطلع على الكنبة فتسيبه يقع ويتعور علشان يتعلم إن ده غلط.
- لما بتقفل دماغها مع الولاد بتكون رخمة جداً وانت بطبعك حنين على الولاد.
- لو حصل أي مشكلة كبيرة بينكم لا قدر الله معرض إنها تاخد ولادك وتسافر وما تشوفهمش تاني.

٢- الزوجة العربية:

المميزات:

- بتربي ولادها كويس جداً والأولاد مؤدبين ولبقين جداً.
- بتهتم بنضافتهم جداً ودايماً ريحتهم حلوة.
- حياة الأولاد مرتبة ومنظمة ونومهم وصحيانهم بمواعيد.
- بتهتم بأكلهم ويكون صحي ومفيد.

العيوب:

- بتسيب الأولاد يتفرجوا على طيور الجنة.
- الأولاد بيتفرجوا على كارتون زيادة عن اللزوم.
- بتنشغل بعض الأوقات عن الأولاد بالإنترنت.

٣- الزوجة المصرية:

المميزات:

- بتكون حنينة جداً على الولاد.
- وبتهتم إنهم ياكلوا كويس.
- فيه كتير منهم بيتعب في توصيلهم المدرسة ومجايبهم وكمان التمارين والدروس.
- مهما كانت مشاكلكم آخرها هتسيب البيت وتروح عند بيت والدها وممكن الأمور تتظبط.

العيوب:

- علشان تخلص من زن الولاد بتشغل لهم كارتون.
- علشان تعرف تركز في الفيسبوك والواتساب بتشغل لهم كارتون.
- علشان تعرف تكلم سوزي وميما وديدا في التليفون بتشغل لهم كارتون.
- مواعيد نومهم وأكلهم مش منتظمة ولا متظبطة، وغالباً بيسهروا معاها وبيتأخروا على المدرسة أو بيروحوا يكملوا نوم هناك.
- الرياضة والتمرين دول في الغالب علشان مي صاحبتها اشتركت لولادها فيهم.
- هدور على أغلى مدرسة وعايزاك تدخل فيها أولادك علشان تتفشخر بيها على سوزي بنت عمها.

عند الطلاق لا قدر الله:

١- الزوجة الأجنبية:

المميزات:

- الأمور هتنتهي بهدوء وعلاقتكم هتبقى كويسة جداً، وهتتكلموا عادي وهتشوف أولادك وتقابلهم وكمان ممكن تخرجوا كلكم سوا وهي معاكم وهتعاملك باحترام جداً وعمرها ما هتشتم فيك قدام أولادك.

العيوب:

- إنها ممكن تاخد أولادك وتسافر بلادها وما تشوفش ولادك تاني.

٢- الزوجة العربية:

المميزات:

- غالباً الأمور بردو بتنتهي بهدوء وبدون محاكم ومش بتحرمك تشوف أولادك.

العيوب:

- ممكن تاخد أولادك وتسافر بردو.

٣- الزوجة المصرية:

المميزات:

- إنها مش هتاخد أولادك وهتسافر.

العيوب:

- إنها هترفع عليك قواضي بعدد شعر راسك وبعدد صفحات كتاب قانون الأسرة اللي اتعمل في مصر.
- هتشتم فيك قدام أولادك وهتكرهم فيك وهتخلي تعاملهم معاك علشان الفلوس وبس.
- عمر ما هيكون فيه بينكم علاقة كويسة في الأغلب إلا نادراً جداً.
- هتشوف ولادك بمزاجها هي وغالباً هتطلع عينك وتكرهك في نفسك علشان تشوف ولادك.

طبعاً كل الكلام اللي اتقال ده مش ملزم ومش قاعدة. لكن بنتكلم على الأغلبية والمنتشر.

الخلاصة مش لازم إنك تتجوز أجنبية هتكون سعيد ومبسوط وأسعد راجل في الدنيا، ومش لازم لو تزوجت مصرية هتكون حياتك نكد، كل زوجة ليها مميزاتها وعيوبها، وانت اللي بتختار وتحدد ده على حسب تقبلك لإيه ورفضك لإيه.

فيه رجالة لو اتجوزت 30 أجنبية هيفضل معاهم ومالوش غير المصرية، وفيه رجالة العكس ما بتنفعش معاه غير الأجنبية.

تاني بقول أكيد فيه بنات مختلفة عن اللي قلته ده، لكن دول النسبة الأقل، وأنا بتكلم على النسبة الأكثر.

وما تنساش القاعدة: "فاظفر بذات الدين تربت يداك".