ملحوظة: التدوينة بالعامية المصرية
التوحد مرض من أكثر الأمراض انتشاراً في العالم زيّه زي أمراض نفسية وعصبية ظهرت كتير مؤخراً أو تم اكتشافها مؤخراً.. زي مرض الديسلاكسيا، ومرض فرط الحركة وتشتت الانتباه.
بحسب الإحصائيات الأخيرة ممكن نقول إن طفلاً من كل 68 طفلاً مصاب بالتوحد، وطفلاً من كل 6 أطفال مصاب بفرط الحركة وتشتت الانتباه "ده بس في أميركا فقط".
الأمراض العصبية تحديداً بتبقى نتيجة خلل في خلايا معينة في المخ أو جزء في المخ بيشتغل مكان جزء تاني.. وعلى حسب درجة المرض بيكون تأثيره مختلف على كفاءة الشخص وفاعليته.
فيه ناس بيبقى عندها الخلل الدماغي ده.. لكن باقي أجزاء المخ بتعمل بكفاءة أعلى.. فبالتالي الشخص المصاب بيبقى في كتير من الحالات قدراته أعلى من الشخص الطبيعي..
على سبيل المثال:
والت ديزني، صاحب شركة ديزني العالمية للكارتون، كان مريضاً بالديسلاكسيا.. اللي هو مرض بيأثر على جزء في المخ المتعلق بالقراية والكتابة والنطق في بعض الأحيان.
وفيه أشكال كتير جداً من الديسلاكسيا ودرجات كتير..
زي الطفل الأشول والطفل اللي بيعكس الحروف والأرقام وهو بيكتبها.. والطفل اللي بتقع منه الحروف وهو بيقرأ أو يكتب.. ده مش غباء ولا نقص في قدراته العقلية؛ لأن مخه بيشتغل بشكل معين.. والدليل على كده إن ألبرت أينشتاين نفسه وليوناردو دافنشي الرسام الشهير برضه كانوا مرضى بالديسلاكسيا..
كل الحكاية إنهم ما بيتعلموش زي الأشخاص العادية؛ لأنهم visual learners.
نفس القاعدة بتنطبق على مرضى التوحد.. والتوحد له أنواع عديدة جداً.. وعلى فكرة التلفزيون والألعاب الإلكترونية مش سبب من أسباب مرض التوحد.. بل بالعكس في مراكز بتعالج التوحد بطريقة Video modeling، بمعنى أنهم بيفرجوا التوحدي على فيديوهات لأشخاص في مواقف معينة عشان يشوفهم بيقولوا إيه وبيعملوا إيه، فبالتمثيل يتعلم منهم ويردد العبارات اللي بتتقال في المواقف المشابهة.. "الكلام ده بينطبق على بعض الحالات مش كل التوحديين"، أو طريقة بكس "إنه بيعلم التوحدي بالصور"؛ لأن معظم التوحديين بيتعلموا بالمشاهدة..
Visual learners
طفل التوحد بيبقى مولود عنده توحد وبيظهر فجأة بعد سن سنتين ونص أو بيبقى في الحالات الشديدة بيبقى باين جداً من الأول.. وأغلبهم بيبقى عنده مشاكل في النوم أو مشاكل في الهضم أو الاتنين..
وبيبقي مشكلة التوحد الأساسية في الحواس.. لكن ده مش معناه إن كل الحواس التانية فيها مشكلة..
بمعنى ممكن يكون التوحدي حساس جداً للمس.. أو ما بيحسش خالص، فممكن يتعور أو يعمل على نفسه، وما يحسش.
ممكن يبقى حساس للضوء.. أو ممكن يفتح عينه في الضوء الشديد اللي البني آدم العادي ما يقدرش يفتح عينه فيه..
مش بقولك قدراته ساعات بتبقى فوق البني آدم العادي.
أغلبهم بيبقى عنده مشكلة في اللغة وبيبقى رافض يتكلم.. وممكن يكون بيتكلم كويس جداً زي الكمبيوتر وذكي جداً في تجميع الأشخاص والأحداث وألعاب البازل وحفظ الأرقام والتواريخ.. لكن زي الكمبيوتر ما بيفهمش تعبيرات الوش والمشاعر.. زي التوحدي من النوع اسبرجر..
عارف زي مين؟
زي بيل جيتس صاحب شركة مايكروسوفت.. كان توحدي من النوع اسبرجر..
وخلّيني أقول كان؛ لأن مرض التوحد اضطراب سلوكي.. وأي سلوك ممكن يتعدل.. وبالتالي ممكن التوحدي بالتدريب يبقى زي البني آدم العادي.. فيما عدا طبعاً القدرات الخاصة اللي اتفقنا عليها..
فيه نوع آخر من مرض التوحد.. بيبقى توحد عالي الأداء.. وده بيبقى الطفل لا زال يحتفظ ببعض القدرات الفائقة إلا أنه عنده مشكلة في اكتساب اللغة والتعبير بيها.. زي مثلاً طفل عنده توحد عالي الأداء عنده تلات سنين وبيعرف يقرأ بعض الكلمات البسيطة وبيعرف يعد لحد 500.. وللعلم محدش علمه.. هو مع نفسه.
فيه أنواع تانية من التوحد زي التوحد الكلاسيكي.. بيبقى الطفل رافض الكلام والتواصل وساعات بيبقى عنده مشاكل في الحركة والأطراف.
وكل الأنواع اللي فاتت دي ممكن علاجها وتعديلها.. وبيفرق على حسب درجة المرض ودرجة الاستجابة وأهم طرق العلاج برامج تعديل السلوك أو تحليل السلوك النطقي ABA.
نسبة كبيرة من التوحديين عندهم مشاكل في الهضم. وكتير منهم بيتحسن وبتقل عنده أعراض التوحد "اللي بتشمل نوبات الغضب ومقاومة تغيير الروتين ورفض الكلام وانعدام التواصل البصري، وعدم القدرة على فهم اللغة واكتسابها واضطراب النوم" لما بيتم منع استبعاد الجلوتين بروتين القمح والكازيين بروتين اللبن من حمية التوحدي، والبعض بيلجأ لاستخدام بعض المكملات الغذائية والفيتامينات زي فيتامين B6، DimethyleGlycine or DMG.
كمان بعض المعادن الهامة زي الحديد والماغنيسيوم مهمين لنمو الطفل ولتحسين أعراض التوحد.
فيه نوع تاني زي التوحد من النوع هيلر بيبقى التوحدي عنده ميول لأكل اللحوم النيئة.
وفيه نوع تاني بيبقى التوحدي ذاكرته زي ذاكرة السمك وما بيقدرش يخزن المعلومات..
في بعض الحالات بيبقى باين أعراض التوحد فيها نتيجة لحركات معينة غير معتادة التوحدي بيعملها.. وبيعملها عشان يريح حواسه المرهقة نتيجة إثارة معينة.. زي إنه يلف حوالين نفسه.. أو بجسمه ييجي قدام وورا وهو واقف أو قاعد.. أو يحط إيده على ودنه ويخبط.. يرفرف بإيده.. أو يخبط دماغه بإيده.. أو يخبط دماغه في الحيط.. أو يلف نفسه بأي حاجة..
"بس فيه أطفال عاديين بيعملوا كده أو طفل عادي بس عنده سمات توحد.. بمعنى إنه عنده شوية سمات من التوحدي، لكن هو مش توحدي.. وده بالوقت وبالتدريب بيروح لما الطفل يتعلم طريقة تانية يفك بيها الضغط النفسي عن نفسه".
بعد ما قريت عن مرض التوحد.. اكتشفت إن كلنا عندنا سمات توحد.. كلنا على الاسبكترم.. بمعنى إنه مرض التوحد ده بيقولوا عليه إنه زي قوس قزح.. مفيش حاجة اسمها ما عندكش توحد.. إنما فيه حاجة اسمها درجتك خفيفة من التوحد.. أو درجتك عالية من التوحد.
ــــــــــــــــــــــ
* مترجم من:
The gift of Dyslexia
Facing Autism
* مصادر أخرى:
https://www.autism.com/
https://www.autismspeaks.org/family-services/resource-guide
* كورسات مجانية:
https://www.coursera.org/learn/autism-spectrum-disorder
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
المصدر : http://www.huffpostarabi.com/shama-helmy-omran/-_12750_b_17631980.html?utm_hp_ref=arabi&ir=Arabi
تعبيراتتعبيرات