ملحوظة: التدوينة بالعامية المصرية
تعريف ومعنى التزام في معجم المعاني الجامع:
التِزام (اسم): الجمع: التزامات، مصدر التزمَ/ التزمَ بـ/ التزمَ لـ تَعَهَّدَ بِالْتِزَامِ الصَّمْتِ: تَعَهَّدَ بِأنْ يَفْرِضَ عَلَى نَفْسِهِ الصَّمْتَ، أَيْ أنْ يُلْزِمَهَا ذَلِكَ، يَعْرِفُونَ الْتِزَامَ حُدُودِهِمْ: وُجُوبَ الوُقُوفِ عِنْدَ حُدُودٍ مُعَيَّنَةٍ.
طيب يعني ملتزم + دينياً تعني أن حياتي كلها في إطار ديني ما ينفعش أطلع برّة حدوده أو على الأقل بجاهد نفسي وهواي وشيطاني عشان أفضل على طريق الالتزام إلى أن يقبض الله روحي على حسن خاتمة، كما يتمنى جميع المسلمين في شتى بقاع الأرض.
هتكلم أكتر عن مجتمع البنات "الملتزمة" بما إني بنت وبحاول أكون ملتزمة، بنت ملتزمة يعني بتعمل كل الفروض وبتجاهد نفسها، وتعمل السنن، وكمان تستزيد أحياناً بالنوافل، حجابها مستوفي الشروط، فإذا التزمت البنت/المرأة به فتلبس "ما شاءت" وتخرج به إلى الأماكن العامة وغيرها، ويكون حجابها حجاباً صحيحاً، وهذه هي الشروط باختصار:
1- أن يكون الحجاب ساتراً لجميع البدن.
2- أن يكون ثخيناً لا يشفّ عما تحته.
3- أن يكون فضفاضاً غير ضيّق.
4- ألا يكون مزيّناً يستدعي أنظار الرجال.
5- ألا يكون مطيّباً.
6- ألا يكون لباس شهرة.
7- ألا يُشبه لباس الرجال.
8- ألا يشبه لباس الكافرات.
9- ألا يكون فيه تصاليب ولا تصاوير لذوات الأرواح.
في الشروط دي أنا ما شُفتش ولا شرط بيحدد زيّ معين أو لون معين، وده من سهولة الدين ويُسره إنه ما أجبرش الواحدة تلبس لبس بعينه يعني اللبس ده ممكن يكون عباية وممكن يكون بلوزة وجِيبة أي لون طالما مش لافت أو أي لبس طالما مستوفي الشروط.
للأسف الشديد إنه ساعات بنات بتفهم إن زيّ الالتزام يعني لبس العباية السوداء وده مش صح ومش غلط - ده عادي ونوع من أنواع الحجاب وشيء جميل جداً، وأنا بحب اللون الأسود والعباية السودا- بدليل شروط الحجاب الصحيح اللي فوق دي.
وبعض البنات بردو فاهمة إنه طالما أنا لابسة الأسود وبطوّل الطرحة فأنا كده بقى اسمي (ملتزمة)، أيوة إنتي اسمك ملتزمة بس ملتزمة -بجزء- الحجاب الصحيح فقط، لسّه بقية الفروض من صوم وصلاة وبر الوالدين ومعاملة الناس معاملة حسنة، وصون اللسان عن أعراض الناس، والتبسم في وجه أخواتك المسلمات -أكيد مش القصد توزع ابتسامات في الشارع- ومساعدة الغير ونظافتك الشخصية...وحاجات كتير أوي عشان الواحد يقدر يوصل لمرحلة الوحش ويقفِل اللعبة ويبقى اسمه ملتزم في كل الفروض والأركان.
بلاش نمشي مكشرين ودايماً يبدو إننا غاضبين من شيء ما كما نجح عادل إمام في ترسيخ هذه الصورة في أذهان الناس.
أنا كنت زمان بمشي مكشرة وفاكرة إنه كده أفضل بس هو مش أفضل ولا حاجة، ما تمشيش بتضحكي ولا مبتسمة حتى امشي عادي وجهك ما فيهوش أي تعبير إلا لو شوفتي ست كبيرة أو طفل ابتسمي لهم وساعدينا نغير صورة بعضنا -بدون قصد- ساهم في رسمها في الأذهان ناهيك عن دور الإعلام العظيم في هذا الأمر.
انتي لو ملتزمة بشروط الحجاب الشرعي فهتكوني باينة أكتر من غيرك إنك بتمثلي الحجاب وساعات كمان بتمثلي الدين -مع اختلافي إنه مفيش حد بيمثل الدين- فكله هيبقى مركّز مع تصرفاتك وزي ما تقولي بيتصيّدوا لكِ الأخطاء!
أيوة عشان يقولوا "أهم الملتزمين شوفتي بيعملوا كذا وكذا" أو "شايفة اللي لابسة نقاب وبتضحك بصوت عالي" أو "همّا دول بقى بتوع العبايات والأسود"!! فأرجوكي إوعى تكوني دعاية سيئة للحجاب الصحيح أو النقاب وانتي مش واخدة بالك.
اللهم إني أسألك الحجاب الصحيح الذي ترضاه عنّي يا ربّ العالمين.. وأعنِّي على نفسي وهواي والشيطان.
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
المصدر : http://www.huffpostarabi.com/maryam-ahmed-kamel/post_15768_b_17848256.html?utm_hp_ref=arabi&ir=Arabi
تعبيراتتعبيرات