10 أشياء لا تقوليها لصديقتك المطلَّقة حديثاً

ملحوظة: التدوينة بالعامية المصرية

عادي إننا نكبر، وعادي لما نكبر نحب ونتجوز، وعادي برضو نتعرض لتجربة مريرة زي الفشل في الجواز، كنتيجة للفشل ده ممكن ناس يكونوا بالجرأة الكافية لخوض تجربة الطلاق، أو حد من المقربين لينا يمر بالتجربة دي، ويكون جوّة دايرتنا وواجب علينا نساعده.

ولأننا كبار كفاية إننا نتعرض لخبر زي ده بسهولة، لازم نكون عارفين إيه اللي ممكن نقوله في المواقف اللي زي دي، وإيه اللي المفروض ما يتقالش، ولأننا أشخاص مختلفين، هتلاقي طرق مختلفة لدعم صاحبتك اللي اتطلقت، حسب شخصيتها، إنما -من وجهة نظري- فيه حاجات ما ينفعش نقولها للست اللي مرت بالتجربة دي جديد.

1- أنا مصدومة أوي.. إزاي ده حصل؟!

أنا مقدرة إنك -بجد- مصدومة، وخاصة لو صاحبتك ما كانتش من النوع الشكّاء البكّاء اللي بتشيّل اللي حواليها الهم، فإنتي وكل اللي حواليها ما كانوش شايفين الخطوة دي خالص، بس تخيّلي حجم صدمتك وقارنيها بصدمة صاحبتك، وكمان قدّري إنها في أمسّ الحاجة للدعم، وصدمة اللي حواليها هتشككها في قدرتهم على مساعدتها وهتحس بوحدة شديدة.

صاحبتك في الحالة دي محتاجة ناس حواليها قادرة على الدعم، ع الأقل دعم معنوي، وإنك تحسسيها بصدمتك في اللي حصل ده أكبر سبب ممكن يخليها تخجل من طلب مساعدتك أو تستصعبها.. فبلاش.

2- سحابة وتعدّي والأمور ترجع لمجاريها

اللي بتقول كده لصاحبتها بيكون قصدها تطبطب عليها، بس إنتي كده بتضرّيها أكتر بكتير ما بتنفعيها، الست اللي بتتطلق بتكون محتاجة تقف على رِجليها، تعتمد على نفسها نفسياً ومادياً، إنتي كده بترجعيها لنقطة الصفر وبتخليها تقعد تستنى إن الموضوع يتصلح بدل ما تساعديها تفكر في الخطوة الجاية.

3- زعلانة على إيه؟! قومي كده واقفي على حيلك.. إنتي أقوى من كده

طب يا جماعة اللي عارف مكان الزرار اللي بندوس عليه فننسى كل حاجة يا ريت يشاور عليه.

هو مين اللي قال إن الحزن ضعف؟! ومين قال إن لما تحصل لي مصيبة كبيرة لازم أقوم منها في نفس اللحظة وأقف كما النخل باصص للسما؟! سيبيها تدي للحزن فرصته وتاخد فرصتها في الزعل عشان يخلص، ما تشجعيهاش تداري على مشاعرها وتقوم تتحرك بالتقل ده كله على قلبها، ساعديها إنها تستنزف الحزن لحد ما يخلص خالص عشان تقوم من الوعكة خفيفة وقادرة تعيش صح.

4- كلنا كنا عارفين إنه مش كويس، الحمد لله إن ربنا خلصك منه

طيب إنتي كده بتقولي لها ضمنياً إنها ما كانتش صح في اختيارها، خاصة لو هي شايفة ده فعلاً، هتدخليها دايرة الخجل من نفسها وتحسسيها إنها ضيعت وقت من عمرها مع الشخص الغلط، ومعتقدش إن دي حاجة مفرحة، وأصلاً مش لازم يكون الطلاق تم لأنه شخص مش كويس، البيوت أسرار على رأي الأستاذ طارق الشيخ، يا ريت تحترمي اختيار صاحبتك في جوازها وتحترميه أكتر في طلاقها.

5- بكرة تتجوزي حد أحسن منه يقدر الجوهرة اللي معاه

صدقيني هي دلوقتي ما بتفكرش في سيد سيده خالص، ما بتفكرش في الرجالة أصلاً، هي غالباً دلوقتي ما بتفكرش أساساً، أو بتفكر في نفسها وبس، فيا ريت تدعميها إزاي هي نفسها تتخطى المحنة من غير مساعدة راجل، ما تشجعيهاش تدخل علاقة جديدة وهي لسه بتنزف من العلاقة القديمة، عشان ده مش صح خالص صدقيني.

6- كده أحسن.. خدنا إيه من الرجالة؟!

برضو مش صح، ما تشحنيهاش ضد الرجالة كلهم، ما تخوفيهاش من الارتباط تاني، دي مش طريقة صحية للتعامل مع الطلاق، إنتي كده بتخليها تبرمج دماغها ع الوحدة المُطلقة وده بيعمل فزع للستات.

7- طب هتعملي إيه دلوقتي؟

بعد الطلاق مباشرة بتكون هي نفسها لسه مش عارفة هتعمل إيه دلوقتي، فما تخضيهاش وتحسسيها إن لازم يكون عندها خطة محكمة؛ لأن خطتها الوحيدة كانت إنها هتكمل معاه باقي حياتها والخطة فشلت، فما تحسسيهاش إنها متأخرة على حاجة ولازم تاخد قرارات مصيرية حالاً، لأنها دلوقتي مشوشة، لو ما عندكيش حاجة محددة تقدري تقدميها لها يا ريت ما تخليش دماغها تحرق شوية البنزين اللي فاضلين في التانك، وده طبعاً نتيجته إنها هتعطل تماماً ومش هتعرف تفكر.

8- ارفعي قضية نفقة وإوعي تسيبي حقك

حاضر، هي هتعمل كل حاجة عشان تحافظ على حق عيالها، سيبيها بس تفوق كده وتعرف راسها من رجليها وبعدين تبقى تدور ع الفلوس، مش وقته، أهم حاجة إنها تقدر تقف على رِجليها عشان ع الأقل تعرف تجيب حقها.

9- كل البيوت فيها مشاكل.. كنتي اصبري وعيشي

صاحبتك اتطلقت خلاص، كلامك ده مالوش أي فايدة غير إنها هتبتدي تلوم نفسها لو هي اللي كانت طالبة الطلاق، ولو مش هي اللي طالباه واتفاجئت بقرار طليقها هتبتدي تفكر هو للدرجة دي كرهني وما بقاش قادر يتحملني ولا يحل مشاكلنا؟ طب هي كانت مشاكلنا كبيرة كده؟ أنا كنت سيئة للدرجة دي؟
هتخلي دماغها تشتغل في منطقة مش المفروض إنها تبذل فيها مجهود دلوقتي، والمفروض -من وجهة نظري- إنها تبتدي تفكر في طريقة تعيش بيها حياتها الجديدة، مش تقعد تهلك نفسها في التفكير في ليه ده حصل، وتستنزف مشاعرها وطاقتها في حاجة خلصت وانتهت.

10- اتطلقتوا ليه بس؟ ده إنتو كنتم حلوين أوي مع بعض

أنا مقدرة إن أحياناً اللي برة الصورة بيكون أقدر إنه يحل المشاكل، بس الفكرة إن هنا في الموقف ده مفيش مشكلة أصلاً، فيه واقع بيقول إنها اتطلقت، فصدقيني التفاصيل مش مهمة أوي دلوقتي، رغم إن ممكن جداً صاحبتك تكون محتاجة تحكي ده ليه حصل، بس لو هي مستعدة تحكي هتلاقيها بتحكي من نفسها من غير أسئلة تحسسها بمدى الفقد وصعوبة اللي هي بتمر بيه.

فسيبيها براحتها وخليكي متلقِّي في المرحلة الأولى، همّ لو كانوا حلوين فعلاً مع بعض الأمور هتهدى وهتلاقيها جايالك عايزاكي تأكديلها الفكرة دي عشان تاخد قرار الرجوع من عدمه، وقتها.. وقتها بس ممكن تصارحيها إنهم فعلاً حلوين مع بعض وجوازهم يستحق محاولة كمان، إنما قبل كده إنتي ممكن تخليها تتحبس في دايرة مغلقة وتفكر في قد إيه علاقتهم كانت حلوة بشهادة الناس، في حين إن الطرف التاني ممكن ما يكونش بيفكر بنفس الطريقة.

يا ستات لو سمحتم.. حاولوا تدعموا أصحابكم اللي بيمروا بالتجربة على قد ما تقدروا، خليكوا على مقربة منهم وحسسوهم إنكم موجودين، خليكي جاهزة لتقديم المساعدة لما صاحبتك تطلبها، إنما ما تضغطيش عليها، سيبيها تفكر هي عايزة إيه منك واعمليه، وحاولي ما تقوليش العشر حاجات دول عشان ما تخسريهاش، لأنها مش حمل خسارة جديدة.

- تم نشر هذه التدوينة في موقع نون