حقيقة ما يحدث لمسلمي الروهينغا..

هذه التدوينة بالعامية المصرية

البوست طويل شوية.. فاللي ملوش في القراية الكتير يشوف الفيديو ده.. قايل كل حاجة في البوست:
*
النهاردة وكالة رويترز نشرت تقرير عن اللي بيحصل في ولاية راخين غرب دولة ميانمار أو بورما سابقاً..

*
رويترز قالت في التقرير إنه خلال الأيام الأخيرة بس.. تم تهجير أكتر من 90 ألف من مسلمي الروهينغا إلى بنغلاديش.. ووصل إجمالي عددهم خلال الشهر ده بس إلى 150 ألف نازح..
*
النزوح ده تم بعبورهم نهر (ناف) الفاصل بين الحدود البنغالية البورمية.. النهر ده اللي عرضه بيوصل في بعض الأماكن لـ3800م.. وعمقه بيوصل 120م.. وبيعدوه بقوارب غاية في الضعف والفقر..
*
النازحون دول فيهم 16 ألف طفل في سن المدرسة.. وأكتر من 5 آلاف طفل أقل من 5 سنين.. وطبعاً، خلال عبورهم النهر، غرق منهم المئات.. واللي محدش قدر ينتشل جثثهم إلى الآن!
*
ده غير عدد 53 جثة جرفها النهر ناحية بنغلاديش.. وكان فيهم آثار ضرب بالرصاص أو طعن بالسكين..
*
الحكومة البنغالية عملت كردون أمني كبير حوالين النازحين.. وهيئات الإغاثة الدولية عملتلهم مخيمات.. لكن المخيمات ما زالت ناقصة كتير من المرافق والخدمات والأدوية.. ده غير الغذاء اللي مش بيكفي العدد الكبير ده..
*
طب إيه القصة من الأول..
*
مسلمو الروهينغا هم (أكثر أقلية مضطهدة في العالم) حالياً، حسب آخر تقرير للأمم المتحدة..
*
قصتهم بدأت مع هجرات المسلمين الأوائل لمناطق جنوب آسيا.. بعض المسلمين الأوائل دول نزلوا على أرض تقع حالياً غرب بورما والتحموا بأهلها..
*
ومع مرور الزمن، كوّنوا فيها منطقة حكم ذاتي ومملكة قوية اسمها (مملكة أراكان) سنة 1430م.. ده طبعاً زي ماليزيا وإندونيسيا وبروناي وغيرهم وغيرهم..
*
المملكة دي اتوسعت في فترات وانكمشت في فترات.. لكن فضلت مملكة إسلامية حكمها 48 ملك مسلم لحد سنة 1784م..
*
في سنة 1784 دي.. غزاها الملك البوذي (بودوييه).. وارتكب فيها مجازر ومحارق من أبشع ما يكون.. لكن فضلت (أراكان) معروفة بتمركز مسلمي بورما فيها..
*
في عهد الاحتلال الإنكليزي لشبه القارة الهندية.. خلوا بورما بحالها منطقة حكم ذاتي منفصل عن الهند.. وده عشان تبقى ثرواتها منفصلة وحساباتها غير.. والسياسة الشهيرة للإنكليز اللي اسمها (فرِّق تَسُد).. نفَّذوها بالحرف في ولاية (أراكان).
*
ولأن البوذيين في بورما أكثر بكثير من المسلمين اللي بيتمركزوا في أراكان بس.. فالإنكليز مولوا البوذيين بالسلاح.. وقوّموهم على بعض في أكتر من حادث مصطنع.. وكانت دي البداية لسلسلة الاضطهاد البوذي لمسلمي الروهينغا في أراكان..
*
سنة 1930، حصلت مذبحة العمال الأراكانيين بعدد 200 قتيل.. سنة 1935، حملة بورما للبورميين فقط.. بهدم 113 مسجداً وتدمير وإحراق عدد من البيوت، وزيها (مذبحة الروهينغا في 1942) غيرهم وغيرهم..
*
ورغم توحد الشعب البورمي، بوذيين ومسلمين، تحت راية (ميليشيات الرفاق الـ30) ضد الإنكليز..
*
إلا أنه بعد رحيل الإنكليز.. المجلس العسكري الحاكم عمل أكتر من قانون للفصل العنصري بين البوذيين والمسلمين.. وبسبب القوانين دي وغيرها، تم حرمان المسلمين من الجنسية والحقوق المدنية كافة.. وتم اعتبار الـ1.2 مليون مسلم أراكاني مهاجرين غير شرعيين من بنغلاديش..
*
وعلى الرغم من أن بورما نفسها فيها أكتر من 8 فصائل وعرقيات مختلفة.. وكمان كل عرقية لها شبه جيش منفصل بيدافع عنها.. لأ ومعترف بيهم كأحزاب سياسية.. أبرزهم العرقية الصينية.. لكن -للأسف- مسلمو أراكان مخدوش الخطوة دي..
*
اللهم إلا دلوقتي ظهرت ميليشيات ضعيفة وبأعداد قليلة.. وغير مدعومة من أي دولة.. فاتكررت أعمال العنف والإقصاء زي سنة 1978 باسم (عملية الملك التنين).. بنزع ملكيات الأراضي والاعتقال والاختفاء القسري والقتل.. مما أدى إلى تهجير 200 ألف روهينغي إلى بنغلاديش..
*
وزيها سنة 1997 و(حركة الرهبان البوذيين) وعدد 1500 بوذي لنهب وهدم مساجد وبيوت المسلمين.. وسنة 2001 والحملة البوذية (الخوف من ضياع العِرق).. وأدت إلى قتل 200 مسلم وتدمير 11 مسجداً وحرق أكتر من 400 بيت..
*
أنظار العالم اتجهت لمذابح الروهينغا سنة 2012 لما مجموعة من أفراد الجيش البورمي اتصوروا وهم بينزّلوا 11 مسلماً روهينغيّاً من أتوبيس خط سير داخل أراكان.. ودبحوهم قدام الأهالي..
*
قامت احتجاجات من المسلمين.. واتقابلت بحملة إبادة من الجيش.. وكان نتيجتها.. خروج نحو 90 ألف نازح.. وإحراق 2528 بيتاً.. منهم 1336 للروهينغا.. و1192 للهنود الراخين..
*
مأساة مسلمي الروهينغا مش بس في بلدهم.. لأ.. ده في كل دولة بيلجأوا لها.. فمثلاً على الرغم من وجود 111 ألف لاجئ على الحدود التايلاندية من الروهينغا.. فإن الحكومة البوذية التايلاندية لا تتوانى عن طردهم وتهجيرهم من جديد.. وإندونيسيا نشرت تقريراً في 2009 بيثبت بالأدلة أن الحكومة التايلاندية رمت أعداداً منهم في البحر!
*
وفي سنة 2005، على الرغم من أن (المفوضية العليا للأمم المتحدة لشؤون اللاجئين).. أصدرت حزمة مساعدات لإعادة توطين مسلمي الروهينغا على حدود بنغلاديش.. إلا أن التقارير وقتها، واللي بتثبت عنصرية حكومة بنغلاديش ضدهم، وقفت المساعدات دي..
*
الدول الإسلامية كانت -وما زالت- بترسل مساعدات غذاء ولبس وأدوية زي (السعودية- تركيا- ماليزيا- إندونيسيا).. لكن المساعدات بتوصل عن طريق الحكومة البورمية صاحبة السيادة على الأرض.. فإيه اللي بيوصل من المساعدات؟!.. الله أعلم..
*
للأسف، دلوقتي معظم دول العالم الأول زي (أميركا- الصين- روسيا) بيحكمهم رؤساء قومجيون وشعبويون.. ومبيبصوش خالص على موضوع حقوق الإنسان والانتهاكات العنصرية دي.. ورغم أنه كان فيه بارقة أمل لمسلمي الروهينغا لما صعدت الزعيمة البورمية (أونغ سان سو تشي).
*
والحاصلة على جايزة نوبل للسلام بعد اضطهادها سنين في فترة الحكم العسكري لبورما.. إلا أنها بعد ما مسكت الحكم طغت المصالح السياسية على الضمير الإنساني.. ورجعت تسمية مسلمي الروهينغا الأراكانيين للتسمية العنصرية القديمة (المهاجرين البنغالة غير الشرعيين)..
*
حتى لجنة (كوفي عنان)، المعنيّة بدراسة أوضاعهم، سمتهم نفس التسمية؛ عشان اللجنة دي مستدعاة وممولة بالكامل من الحكومة البورمية.. وكمان الحكومة البورمية رفضت إمبارح إصدار تأشيرات لمندوبي الأمم المتحدة لتقصّى الحقائق..
*
مش بس كده.. على الرغم من أن السوشيال ميديا هي الحاجة الوحيدة اللي ممكن كان يتم استغلالها لدعم حقوق الروهينغا في أرضهم وحقوقهم المدنية.. إلا أن التشويه نالهم من مرضى الإسلاموفبيا.. وبالذات المسلمين اللي بيكرهوا كونهم مسلمين.. ولا معترفين بأي حاجة في دينهم..
*
عملوا إيه بقى دول؟
*
ميّعوا قضية مسلمي الروهينغا.. جابوا صور مفبركة لمواقع هزلية لمذابح في بلاد تانية بتقول إنها لمسلمي الروهينغا.. فييجي المسلم اللي بالاسم ده.. ويقول صورهم وفيديوهاتهم كلها مفبركة..
*
على الرغم من أن لو حد فيهم تعب نفسه وبحث في وكالات الأخبار وهيئات الإغاثة هيلاقي آلاف الصور والفيديوهات لمذابح الروهينغا على أيدي البوذيين.. وكمان باعتراف الأمم المتحدة ومنظمات حقوق الإنسان العالمية..
*
لكن المسلمين الصوريين دول مبسوطين بفكرتهم القذرة دي.. وهي أن المسلمين عموماً هم أسفل أهل الأرض.. ويستاهلوا اللي يجرى عليهم من أي حد معدّي في الشارع.. وبدل ما يدعم أي قضية تخص أي مسلم!
*
لا بيشوهها في سبيل دعم أي حد غير مسلم.. وعلى فكرة بقى اللي بيصور وبيظهر نفسه سيلفي في فيديوهات الإبادة دلوقتي هم أفراد الجيش البورمي نفسهم.. بصوا كده..
*
ادعموا قضية مسلمي الروهينغا.. واتكلموا عنها عشان يجيلهم جزء من حقهم الضايع.. زي ما حصل مع مسلمي البوسنة قبل كده..
*
‪#stop_killing_rohngiya_muslim‬
#أوقفوا_قتل_مسلمي_الروهينغيا